اخدت حقي ف 72 ساعه

.كانت نورا ماسكة إيد ولادها الاتنين بقوة، صوابعهم الصغيرة كانت بتترعش جوه إيدها، وهما بيبصوا وراهم للباب اللي لسه مقفول في وشهم. القفلة مكنتش عادية، كانت قفلة فيها غل وقسوة سمعت صدى خبطتها في ضلوعها.
مش عايز أشوف رجلك في البيت ده تاني!
دي كانت آخر كلمة قالها عصام، جوزها.
عشر سنين جواز، طفلين، سهر وتضحية، وأحلام ركنتها على جنب عشان تبني له بيت. كل ده اتمسح في جملة واحدة. قبلها بساعتين كانت بتحضر العشا، والولاد بيعملوا الواجب، ليلة عادية جداً.. لحد ما دخل عصام، ومكنش لوحده.
كانت معاه واحدة.. لابسة شيك جداً، هادية، وبرودها يقتل.
خلاص خلصنا.. لمي حاجتك وامشي. قالها بمنتهى الثقة، كأنه بيطرد حد غريب مش شريكة عمره.
نورا افتكرت في الأول إنها مقلب سخيف، بس لما شافت نظرة الرعب في عين ولادها، عرفت إن اللعبة حقيقة.
بس هنروح فين في البرد ده؟ همست بصوت مخنوق.
رد ببرود أرعبها مبقتش مشكلتي خلاص.
لمت هدومها وهي إيدها بتترعش، وخرجت للمطر والذل مالي قلبها. مفيش حد وقفها، غير الواحدة دي.. العشيقة.
طلعت وراهم في المطر، نورا افتكرت إنها جاية تشمت، أو ترمي كلمة تسمّ بيها بدنها. لكن اللي حصل كان أغرب من الخيال.
الست قربت ببطء، طلعت ظرف من شنطتها الغالية وحطته في إيد نورا.
خدي ده.
نورا رجعت لورا مش عايزة حاجة منك!
الست أصرت وحطت الظرف في إيدها اعملي كدة عشانهم.. عشان الولاد.
نورا قفلت صوابعها على الظرف وهي مش فاهمة حاجة.. ليه؟
الست قربت من ودنها وهمست ارجعي هنا كمان تلات أيام.. هتلاقي مفاجأة عمرك ما حلمتي بيها.
واستدارت الست ورجعت البيت ببرود، وسابت نورا واقفة في الشارع تايهة.
تاني يوم الصبح، نورا فتحت الظرف وهي عند صاحبتها.. لقت جواه 100 ألف جنيه كاش! . الكاتب_علي_ابوالدهب
ليه واحدة غريبة تعمل كدة؟ ليه الست اللي خدت جوزها تساعدها؟
تلات أيام عدوا كأنهم سنين. نورا كانت بين نارين، الخوف والأمل.
وفي اليوم التالت.. وقفت قدام نفس الباب. قلبها كان بيدق كأنه هيقف. رفعت إيدها وخبطت.. ثواني مرت كأنها دهر.
المقبض اتحرك.. الباب اتفتح ببطء..
واللي شافته جوه، خلاها تتصدم لدرجة إن لسانها عجز عن النطق!
يتبع 
صلوا على حبيبنا و شفيعنا محمد ﷺ 
عدّت ال 72 ساعة على نورا كأنهم 72 سنة. كانت قاعدة في أوضة ضيقة عند صاحبتها، بتبص لل 100 ألف جنيه اللي في الظرف وتقول لنفسها يا ترى دي دية كرامتي؟ ولا تمن سكوتي؟. الولاد كانوا كل شوية يسألوها يا ماما هو بابا زعلان مننا؟ هي طنط دي هتاخد لعبنا؟. كانت بتبلع غصتها وتقولهم بكرة كل حاجة هتبان.
جه اليوم الثالث. نورا لبست أحسن طقم عندها، حطت كحل في عينيها عشان تداري آثار السهر، وراحت وقفت قدام باب شقتها.. نفس الباب اللي انطردت منه في المطر.
خبطت خبطة واثقة. الباب اتفتح.
الست العشيقة هي اللي فتحت، كانت لابسة فستان أحمر ناري وماسكة كاس عصير، وبصت لنورا من فوق لتحت بابتسامة غريبة وقالتلها جيتي في وقتك.. العرض لسه هيبدأ.
دخلت نورا الصالة، ولقت عصام قاعد ببرنس الحمام، حاطط رجل على رجل، وأول ما شافها ضحك بسخرية
إيه اللي جابك يا نورا؟ مش قلتلك ملكيش مكان هنا؟ الظاهر ال 100 ألف اللي جيجي ادهوملك خلصوا في يومين.. طماعة قوي!
نورا مردتش، كانت بتبص ل جيجي اللي راحت وقفت جنبه ودلعت إيدها على كتفه، وفجأة ضحكت ضحكة عالية وقالت ل عصام
عصام حبيبي.. مش عيب تكسف أم عيالك؟ وبعدين هي جاية في بيتها.. مش كدة ولا إيه؟
عصام استغرب بيتها إيه يا جيجي؟ أنتي عارفة إني كتبتلك الشقة دي والفيلا بتاعت الساحل من يومين بس.. أنتي اللي صاحبة البيت دلوقتي.
هنا، جيجي ملامحها اتغيرت 180 درجة. سابت كتفه، وطلعت ملف ورق من ورا ضهرها ورمته في وشه
صح.. الشقة والفيلا والشركة بقوا باسمي.. بس أنتي نسيت يا عصمة إني المحامية اللي كنت بتخلص لك ورق النصب بتاعك من سنين؟ ونسيت إني كنت عارفة إنك ناوي تخلع بيا وبفلوس نورا وتجري على بره؟
عصام وقف مصدوم أنتي بتقولي إيه؟
جيجي بصت ل نورا وقالتلها بفخر نورا.. أنا عمري ما كنت عشيقته. أنا كنت عينه اللي بيشوف بيها، ولما لقيته بيخطط يرميكي أنتي والغلابة دول في الشارع عشان يهرب بفلوس شقاكي وشقا أهلك، قررت أعمل معاه الواجب.. أنا خليته يمضي على تنازل بكل أملاكه ليا أنا.. والورقة اللي في إيدي التانية دي، هي عقد بيع نهائي مني ليكي أنتي يا نورا.. بكل مليم خده منك بالكدب.
المواجهة الأخيرة النهاية في القاع
في اللحظة دي، الباب اتفتح ودخل اتنين رجالة ببدل رسمية.. مباحث الأموال العامة.
عصام وشه بقى أبيض زي الورق، حاول يجري ناحية الأوضة، بس جيجي وقفت قدامه
على فين يا بطل؟ الشيكات اللي كنت بتمضيها باسم الشركة الوهمية، والبلاغات اللي أنا قدمتها الصبح، خلتك مطلوب رسمياً.. أنت دلوقتي ملكش هنا غير الهدوم اللي عليك.. وحتى دي، نورا هي اللي دفع تمنها.
نورا قربت من عصام، اللي كان بيترعش ومنهار، وبصت في عينه بقوة لأول مرة من سنين
كنت فاكر إن الست ضعيفة يا عصام؟ كنت فاكر إنك لما تطردنا في المطر هنتمحي من الدنيا؟ المطر ده غسل عيني عشان أشوف حقيقتك.. جيجي علمتني إن الحق مبيضيعش، بس محتاج دماغ تجيبه.
نورا طلعت ال 100 ألف جنيه من شنطتها، وحدفتهم في وشه
ودول خليهم معاك.. يمكن تحتاجهم تمن عيش وحلاوة في السجن.. أو يمكن تشتري بيهم كرامة جديدة بدل اللي بعتها.
عصام وهو بيتاخد بالكلبشات، بص ل جيجي بغل بعتيني يا جيجي؟ بعد كل اللي عملته عشانك؟
ردت عليه ببرود أنا مبعتش.. أنا بس نضفت السوق من واحد زيك.. ونورا وأولادها هما اللي يستحقوا البيت ده.
خرج عصام مكسور، والولاد دخلوا البيت يجروا على أوضهم وهما مش مصدقين إنهم رجعوا. نورا لفت ل جيجي وقالتلها والدموع في عينيها أنا مش عارفة أشكرك إزاي.. أنتي ليه عملتي كل ده؟
جيجي شالت شنطتها وقالتلها وهي خارجة عشان أنا كمان كنت في يوم مكانك يا نورا.. وانطردت في المطر ومقيتش حد يسندني.. حلفت يومها إني مش هسيب عصام تاني يكرر المأساة دي مع ست تانية.. عيشي حياتك، وبكرة المطر هيوقف، والشمس هتطلع ليكي ولوحدك.